ദർബാർ ഹാളിൻ്റേയും അശോക ഹാളിൻ്റേയും പേര് മാറ്റി
ന്യൂഡൽഹി :
നിരവധി ആചാരപരമായ ചടങ്ങുകളുടെ വേദിയായ രാഷ്ട്രപതി ഭവനിലെ ഐതിഹാസികമായ ദർബാർ ഹാളിൻ്റേയും അശോക ഹാളിൻ്റേയും പേര് മാറ്റി. യഥാക്രമം ഗണതന്ത്ര മണ്ഡപം എന്നും അശോക് മണ്ഡപം എന്നുമാണ് പുനർനാമകരണം ചെയ്തിരിക്കുന്നത്. ദേശീയ പുരസ്കാര സമർപ്പണം നടക്കുന്ന വേദിയാണ് ദർബാർ ഹാൾ.
ഇന്ത്യൻ ഭരണാധികാരികളുടെയും ബ്രിട്ടീഷുകാരുടെയും കോടതികളെയും അസംബ്ലികളെയും പരാമർശിക്കുന്ന ‘ദർബാറി’ന് ഇന്ത്യ റിപ്പബ്ലിക്കായതിന് ശേഷം പ്രസക്തി നഷ്ടപ്പെട്ടതായി സർക്കാർ ഒരു ഔദ്യോഗിക പ്രസ്താവനയിൽ പറഞ്ഞു.’ഗണതന്ത്ര’ എന്ന ആശയം പുരാതന കാലം മുതൽ ഇന്ത്യൻ സമൂഹത്തിൽ ആഴത്തിൽ വേരൂന്നിയതാണ്. ‘ഗണതന്ത്ര മണ്ഡപം’ ഈ വേദിക്ക് അനുയോജ്യമായ പേരാക്കി മാറ്റുന്നു,” പ്രസ്താവനയിൽ സർക്കാർ കൂട്ടിച്ചേർത്തു.
അശോക് ഹാളിൻ്റെ പേരുമാറ്റാനുള്ള തീരുമാനത്തിൽ, ‘അശോക് മണ്ഡപ്’ എന്ന പേര് ഭാഷയിൽ ഏകീകൃതത കൊണ്ടുവരുന്നുവെന്നും ‘അശോക്’ എന്ന വാക്കുമായി ബന്ധപ്പെട്ട അടിസ്ഥാന മൂല്യങ്ങൾ ഉയർത്തിപ്പിടിക്കുന്നതിനൊപ്പം തന്നെ ആംഗലേയവൽക്കരണത്തിൻ്റെ അടയാളങ്ങൾ ഇല്ലാതാക്കുമെന്നും സർക്കാർ പറഞ്ഞു.
