തീരദേശ ഹർത്താൽ തുടങ്ങി
ആലപ്പുഴ:
കേന്ദ്ര സർക്കാരിന്റെ കടൽ മണൽ ഖനനത്തിനെതിരെ മത്സ്യത്തൊഴിലാളി കോ-ഓർഡിനേഷൻ കമ്മിറ്റിയുടെ നേതൃത്വത്തിൽ നടത്തുന്ന 24 മണിക്കൂർ തീരദേശ ഹർത്താൽ ആരംഭിച്ചു. ബുധനാഴ്ച രാത്രി 12 മുതൽ ആരംഭിച്ച സമരത്തിൽ കാസർകോട് മുതൽ തിരുവനന്തപുരം വരെയുള്ള മേഖല നിശ്ചലമായി. ഹാർബർ, മാർക്കറ്റുകൾ എന്നിവ പൂർണമായും അടഞ്ഞുകിടക്കുകയാണ്. മത്സ്യവിതരണ മേഖലയും പീലിങ് അടക്കുള്ള അനുബന്ധ മേഖലകളും പങ്കാളികളായി. എൽഡിഎഫിലെയും യുഡിഎഫിലെയും പാർട്ടികൾ, ലത്തീൻ സഭ, ധീവരസഭ, വിവിധ ജമാഅത്തുകൾ എന്നിവയുടെ പിന്തുണയോടെയാണ് ഹർത്താൽ. സംസ്ഥാനത്തെ 125 കേന്ദ്രങ്ങളിൽ രാവിലെ 9 ന് തൊഴിലാളികളുടെ പ്രതിഷേധപ്രകടനവും പൊതുസമ്മേളനവും നടക്കും.
