അരവിന്ദ് കെജ്‌രിവാൾ ജയിൽ മോചിതനായി
ഡൽഹി :
ഡൽഹി മുഖ്യമന്ത്രിയും ആം ആദ്മി പാർട്ടി (എഎപി) മേധാവിയുമായ അരവിന്ദ് കെജ്‌രിവാൾ, എക്‌സൈസ് നയ അഴിമതിയുമായി ബന്ധപ്പെട്ട് സിബിഐ സമർപ്പിച്ച അഴിമതിക്കേസിൽ ജാമ്യം ലഭിച്ച് തിഹാർ ജയിലിൽ നിന്ന് പുറത്തിറങ്ങി. രാജ്യതലസ്ഥാനത്ത് കനത്ത മഴയിലും ആയിരങ്ങളാണ് പ്രിയ നേതാവിനെ കാണാൻ തടിച്ചുകൂടിയത്.
ഭാര്യ സുനിത കെജ്‌രിവാൾ, മുതിർന്ന എഎപി നേതാക്കളായ മനീഷ് സിസോദിയ, അതിഷി, സഞ്ജയ് സിംഗ്, ഭഗവന്ത് മാൻ എന്നിവരും അദ്ദേഹത്തോടൊപ്പമുണ്ടായിരുന്നു. ഒരു കാറിൻ്റെ സൺറൂഫിലൂടെ നിന്നുകൊണ്ട് ആം ആദ്മി നേതാവ് തിഹാർ ജയിലിന് പുറത്ത് തടിച്ചുകൂടിയ പാർട്ടി പ്രവർത്തകരെ അഭിസംബോധന ചെയ്യുകയും “ജയിൽ കേ താലേ ടൂട്ട് ഗയേ, കെജ്‌രിവാൾജി ചൂട്ട് ഗയേ” എന്ന് മുദ്രാവാക്യം വിളിക്കുകയും ചെയ്തു.
ജസ്റ്റിസുമാരായ സൂര്യകാന്ത്, ഉജ്ജൽ ഭൂയാൻ എന്നിവരടങ്ങിയ ബെഞ്ച് കെജ്‌രിവാളിന് ഇളവ് അനുവദിച്ചെങ്കിലും മുഖ്യമന്ത്രിയുടെ ഓഫീസ് (സിഎംഒ) സന്ദർശിക്കുന്നതിൽ നിന്നും ഏതെങ്കിലും ഔദ്യോഗിക രേഖകളിൽ ഒപ്പിടുന്നതിൽ നിന്നും അദ്ദേഹത്തെ വിലക്കി.
