IFFK സിനിമാ വിലക്ക്: ചലച്ചിത്ര അക്കാദമിയുടെ ഭാഗത്ത് വീഴ്ചയില്ലെന്ന് റസൂൽ പൂക്കുട്ടി; കേരളത്തിന്റേത് ശക്തമായ രാഷ്ട്രീയ നിലപാട്
തിരുവനന്തപുരം:
അന്താരാഷ്ട്ര ചലച്ചിത്ര മേളയിലെ (IFFK) സിനിമാ വിലക്കുമായി ബന്ധപ്പെട്ട വിവാദങ്ങളിൽ വിശദീകരണവുമായി ചലച്ചിത്ര അക്കാദമി ചെയർമാൻ റസൂൽ പൂക്കുട്ടി. സിനിമകൾക്ക് പ്രദർശന അനുമതി തേടുന്നതിൽ അക്കാദമിയുടെ ഭാഗത്ത് നിന്ന് യാതൊരുവിധ കാലതാമസവും ഉണ്ടായിട്ടില്ലെന്നും കൃത്യസമയത്ത് തന്നെ അപേക്ഷകൾ നൽകിയിരുന്നതായും അദ്ദേഹം വ്യക്തമാക്കി.
ആദ്യ ഘട്ടത്തിൽ 187 സിനിമകൾക്ക് പ്രദർശനാനുമതി നിഷേധിച്ച സാഹചര്യമാണ് ഉണ്ടായിരുന്നത്. ഇന്ത്യയുടെ വിദേശകാര്യ നയവുമായി ബന്ധപ്പെട്ട കാരണങ്ങളാലാണ് അനുമതി നിഷേധിച്ചതെന്ന് ചീഫ് സെക്രട്ടറി ഉൾപ്പെടെയുള്ളവർ അറിയിച്ചു. എന്നാൽ മന്ത്രിതലത്തിലും ഉദ്യോഗസ്ഥ തലത്തിലും നടത്തിയ ശക്തമായ ഇടപെടലുകൾക്കൊടുവിലാണ് സിനിമകൾക്ക് പ്രദർശനാനുമതി ലഭ്യമായത്. ചില സിനിമകളുടെ കാര്യത്തിൽ വാക്കാൽ പറഞ്ഞ ഉറപ്പുകൾ ഉത്തരവ് വന്നപ്പോൾ മാറിയത് മുഖ്യമന്ത്രിയെ ധരിപ്പിച്ചിരുന്നു. ഇതിനുപിന്നാലെയാണ് എല്ലാ ചിത്രങ്ങളും പ്രദർശിപ്പിക്കുമെന്ന ശക്തമായ രാഷ്ട്രീയ നിലപാട് കേരളം സ്വീകരിച്ചതെന്നും റസൂൽ പൂക്കുട്ടി പറഞ്ഞു.
മറ്റ് വിവാദങ്ങളിലും അക്കാദമി ചെയർമാൻ നിലപാട് വ്യക്തമാക്കി:
- പി.ടി. കുഞ്ഞുമുഹമ്മദിനെതിരായ പരാതി: പരാതി ലഭിച്ച നിമിഷം തന്നെ നടപടികൾ സ്വീകരിച്ചിട്ടുണ്ടെന്നും ഇക്കാര്യത്തിൽ ഒട്ടും വൈകിയിട്ടില്ലെന്നും അദ്ദേഹം പറഞ്ഞു.
- നടി ആക്രമിക്കപ്പെട്ട കേസ്: കേരളത്തിലെ സിനിമാ പ്രവർത്തകരും ചലച്ചിത്ര മേഖലയും അതിജീവിതയ്ക്കൊപ്പമാണെന്ന് (‘അവൾക്കൊപ്പം’) അദ്ദേഹം ആവർത്തിച്ചു.
