ഇറാനെതിരെ ശക്തമായ തിരിച്ചടിക്ക് ഇസ്രായേൽ തയാറെടുക്കുന്നു: മുന്നറിയിപ്പുമായി പ്രതിരോധ മന്ത്രി
തെൽ അവിവ് — അമേരിക്കയും ഇറാനും തമ്മിലുള്ള പോരാട്ടം ശക്തമാകുന്നതിനിടെ, ഇറാനെതിരെ പുതിയ സൈനിക നടപടികൾക്ക് ഇസ്രായേൽ തയാറെടുക്കുന്നതായി റിപ്പോർട്ട്. മേഖലയിൽ സംഘർഷം രൂക്ഷമായ സാഹചര്യത്തിൽ പ്രതിരോധത്തിനും ആക്രമണത്തിനും ഒരുപോലെ സജ്ജമാണെന്ന് ഇസ്രായേൽ പ്രതിരോധ മന്ത്രി ഇസ്രായേൽ കാറ്റ്സ് വ്യക്തമാക്കി.
തെക്കൻ ജോർദാനിലെ അഖബ നഗരത്തെ ലക്ഷ്യമിട്ട് ഇറാൻ തൊടുത്ത മൂന്ന് മിസൈലുകൾ ലക്ഷ്യസ്ഥാനത്ത് എത്തുന്നതിന് മുമ്പ് തകർത്തു. അമേരിക്കയും ഇറാനും തമ്മിൽ ഏപ്രിൽ 7-ന് നിലവിൽ വന്ന വെടിനിർത്തലിന് ശേഷം ഇതാദ്യമായാണ് ഇസ്രായേൽ അതിർത്തി നഗരമായ എലാറ്റിൽ വച്ച് മിസൈൽ അവശിഷ്ടങ്ങൾ തകർക്കാൻ ഇസ്രായേലിന്റെ വായു പ്രതിരോധ സംവിധാനം സജ്ജമാക്കിയത്. ചെങ്കടൽ തീരദേശ റിസോർട്ട് മേഖലയിൽ അയൺ ഡോം ഇന്റർസെപ്റ്ററുകളുടെ ശക്തമായ സ്ഫോടന ശബ്ദങ്ങൾ കേട്ടതായി പ്രാദേശിക മാധ്യമങ്ങൾ റിപ്പോർട്ട് ചെയ്തു.
ഇതിനുപിന്നാലെയാണ് പ്രതിരോധ മന്ത്രി ഇസ്രായേൽ കാറ്റ്സ് ശക്തമായ മുന്നറിയിപ്പുമായി രംഗത്തെത്തിയത്. “ഇറാൻ ഇസ്രായേലിന് നേരെ മിസൈലുകൾ തൊടുത്താൽ, പൂർണ്ണ ശക്തിയോടെ ഞങ്ങൾ തിരിച്ചടിക്കും,” എന്ന് അദ്ദേഹം പ്രഖ്യാപിച്ചു. ടെഹ്റാനിലെ ഭരണകൂടത്തിനെതിരെ പ്രതിരോധപരവും ആക്രമണപരവുമായ എല്ലാ നടപടികൾക്കും ഇസ്രായേൽ സൈന്യം തയാറാണെന്നും അദ്ദേഹം കൂട്ടിച്ചേർത്തു.
