ബ്രസീലിനെ സമനിലയിൽ തളച്ച് മൊറോക്കോ; കാനറികൾക്ക് ലോകകപ്പിൽ അപ്രതീക്ഷിത തിരിച്ചടി
ഗോളടിച്ച ശേഷം നൃത്തച്ചുവടുകളുമായി വിനീഷ്യസ് ജൂനിയർ ആഘോഷിക്കുന്നു.
ന്യൂജേഴ്സി:
ഫിഫ ലോകകപ്പിലെ തങ്ങളുടെ ആദ്യ പോരാട്ടത്തിൽ തന്നെ മുൻ ചാമ്പ്യന്മാരായ ബ്രസീലിന് അപ്രതീക്ഷിത തിരിച്ചടി. കരുത്തരായ കാനറികളെ 1-1 എന്ന നിലയിൽ സമനിലയിൽ തളച്ച് ആഫ്രിക്കൻ വന്മതിലായ മൊറോക്കോ ഈ ലോകകപ്പിലും തങ്ങളുടെ ശക്തമായ സാന്നിധ്യം അറിയിച്ചു. മത്സരത്തിൻ്റെ ആദ്യ പകുതിയിലാണ് ഇരു ടീമുകളും ഗോൾ നേടിയത്.
മത്സരത്തിൻ്റെ തുടക്കം മുതൽ തന്നെ ആഫ്രിക്കൻ കരുത്തരായ മൊറോക്കോ മികച്ച ആക്രമണ ഫുട്ബോൾ ആണ് പുറത്തെടുത്തത്. ബ്രസീലിയൻ പ്രതിരോധത്തെ സമ്മർദ്ദത്തിലാക്കിക്കൊണ്ട് മൊറോക്കൻ താരങ്ങള് നിരന്തരം മുന്നേറ്റങ്ങൾ നടത്തിക്കൊണ്ടിരുന്നു. ഇതിൻ്റെ ഫലമായി മത്സരത്തിൻ്റെ 21-ാം മിനിറ്റിൽ തന്നെ മൊറോക്കോ ആദ്യ ഗോൾ നേടി ബ്രസീലിനെ ഞെട്ടിച്ചു.
സൂപ്പർ താരം ബ്രാഹിം ഡയസ് നൽകിയ മനോഹരമായ പാസ് സ്വീകരിച്ച് ഇസ്മയേൽ സൈബാരിയാണ് മൊറോക്കോയ്ക്കായി ലക്ഷ്യം കണ്ടത്. മുന്നോട്ട് കയറി വന്ന ബ്രസീൽ ഗോൾകീപ്പർ അലിസൺ ബെക്കറുടെ തലയ്ക്ക് മുകളിലൂടെ മനോഹരമായി പന്ത് ചിപ്പ് ചെയ്ത് സൈബാരി വലയിലാക്കുകയായിരുന്നു. എന്നാൽ പിന്നീട് ആദ്യ പകുതി അവസാനിക്കുന്നതിന് മുൻപ് തന്നെ തിരിച്ചടിച്ച ബ്രസീൽ മത്സരത്തിലേക്ക് തിരിച്ചെത്തി. രണ്ടാം പകുതിയിൽ ഇരു ടീമുകളും വിജയഗോളിനായി കടുത്ത പോരാട്ടം നടത്തിയെങ്കിലും പിന്നീട് ഗോളുകളൊന്നും പിറന്നില്ല.
