ഇറാൻ യുദ്ധം അവസാനിപ്പിക്കാൻ ധാരണയിലെത്തിയതായി ട്രംപ്; തൽക്കാലം പുതിയ ആക്രമണങ്ങളില്ല
ബാഗ്ദാദ്:
അഞ്ച് മാസം നീണ്ട ഇറാൻ യുദ്ധം അവസാനിപ്പിക്കുന്നതിനായുള്ള കരാറിന്റെ അടിസ്ഥാന രൂപരേഖയിൽ മിഡിൽ ഈസ്റ്റിലെ സഖ്യരാജ്യങ്ങൾ ധാരണയിലെത്തിയതായി അമേരിക്കൻ പ്രസിഡന്റ് ഡൊണാൾഡ് ട്രംപ് വ്യക്തമാക്കി. സോഷ്യൽ മീഡിയ പോസ്റ്റിലൂടെയാണ് ട്രംപ് ഇക്കാര്യം അറിയിച്ചത്. ധാരണയായതിനെത്തുടർന്ന് തൽക്കാലം ഇറാനെതിരെ പുതിയ സൈനിക ആക്രമണങ്ങൾ നടത്തില്ലെന്നും അദ്ദേഹം പറഞ്ഞു.
ഹോർമൂസ് കടലിടുക്ക് ഉടനടി പൂർണ്ണമായും തുറന്നുകൊടുക്കുന്നതും ഇറാന്റെ ആണവ ഭീഷണി അവസാനിപ്പിക്കുന്നതും ഉൾപ്പെടുന്നതാണ് രൂപപ്പെടുന്ന പുതിയ കരാർ എന്ന് ട്രംപ് വ്യക്തമാക്കി. “ലോകത്തിന്റെ ഭാവി നന്മയ്ക്കായും സമൃദ്ധമായ ഇറാന്റെ നിലനിൽപ്പിനായും, വേഗത്തിൽ കരാറിലെത്താം എന്ന ഉറപ്പിൽ ആക്രമണം റദ്ദാക്കാൻ ഞാൻ സമ്മതിച്ചിരിക്കുന്നു,” എന്ന് ട്രംപ് കുറിച്ചു.
യുദ്ധം അവസാനിപ്പിക്കുന്നതിനായി ഇറാനുമായി ഉണ്ടാക്കുന്ന ഈ കരാർ പൂർത്തിയാക്കാനുള്ള ശ്രമങ്ങളിൽ യുഎസിനൊപ്പം ചേരാൻ ഇസ്രായേലും സമ്മതിച്ചിട്ടുണ്ടെന്ന് ട്രംപ് കൂട്ടിച്ചേർത്തു.
അതേസമയം, ശനിയാഴ്ച നേരത്തെ അമേരിക്ക ഇറാനെതിരെ കൂടുതൽ ശക്തമായ സൈനിക നടപടികളിലേക്ക് കടക്കുന്നത് വലിയ പ്രത്യാഘാതങ്ങൾ ഉണ്ടാക്കുമെന്ന ആശങ്ക സൗദി കിരീടാവകാശി മുഹമ്മദ് ബിൻ സൽമാൻ രാജകുമാരൻ ട്രംപുമായുള്ള ഫോൺ സംഭാഷണത്തിൽ പങ്കുവെച്ചിരുന്നു.
