പൂട്ടിക്കിടക്കുന്ന എസ്റ്റേറ്റുകൾ ഉടൻ തുറക്കണം: കേരള പ്ലാന്റേഷൻ വെൽഫെയർ മിഷൻ

പീരുമേട്:

കാൽ നൂറ്റാണ്ടായി പീരുമേട് താലൂക്കിൽ പൂട്ടിക്കിടക്കുന്ന തോട്ടങ്ങൾ തുറന്നു പ്രവർത്തിപ്പിക്കാൻ സർക്കാർ അടിയന്തര നടപടി സ്വീകരിക്കണമെന്ന് കേരള പ്ലാന്റേഷൻ വെൽഫെയർ മിഷൻ സംസ്ഥാന കമ്മിറ്റി യോഗം ആവശ്യപ്പെട്ടു.

തൊഴിലാളികൾക്ക് അർഹതപ്പെട്ട ഗ്രാറ്റുവിറ്റി, പി.എഫ്, ശമ്പള കുടിശ്ശിക തുടങ്ങിയ ആനുകൂല്യങ്ങൾ വർഷങ്ങളായി തോട്ടം ഉടമകൾ നൽകിയിട്ടില്ല. ശക്തമായ കാലവർഷക്കെടുതി നേരിട്ട്, നൂറ്റാണ്ടുകൾ പഴക്കമുള്ള ജീർണ്ണിച്ച ലയങ്ങളിലാണ് തൊഴിലാളികൾ ഇപ്പോഴും കഴിയുന്നത്. അതിനാൽ തൊഴിലാളികൾക്കായി അടിയന്തര ഭവന പുനരധിവാസ പദ്ധതി നടപ്പാക്കണമെന്നും യോഗം സർക്കാരിനോട് അഭ്യർത്ഥിച്ചു.

യോഗത്തിൽ ചെയർമാൻ ഷിബു കെ. തമ്പി അധ്യക്ഷത വഹിച്ചു. ഡോ. എം.കെ. രാജു, പി.ടി. ശ്രീകുമാർ, സന്തോഷ് കൃഷ്ണൻ, ഖാലിദ് സഖാഫി, ഡോ. തോമസ് വൈദ്യൻ, എ.എം. റെജിമോൻ, സാജൻ ജോസഫ്, ഷിനോജ് ജോസഫ്, ജോസഫ്, വി.കെ. സെന്തിൽ, കെ. വിനോദ് എന്നിവർ സംസാരിച്ചു.