275 വർഷത്തെ പഴക്കം; പത്മനാഭസ്വാമി ക്ഷേത്രത്തിലെ മൂലബിംബ പുനരുദ്ധാരണ ചടങ്ങുകൾക്ക് ഭക്തിസാന്ദ്രമായ തുടക്കം

തിരുവനന്തപുരം:

ചരിത്രപ്രസിദ്ധമായ ശ്രീ പത്മനാഭസ്വാമി ക്ഷേത്രത്തിലെ മൂലബിംബത്തിന്റെയും 30 പരിവാര ദേവതകളുടെയും ബിംബങ്ങളുടെയും പുനരുദ്ധാരണ പ്രവർത്തനങ്ങൾക്ക് ഭക്തിസാന്ദ്രമായ തുടക്കമായി. കാലപ്പഴക്കം കൊണ്ടുണ്ടായ ന്യൂനതകൾ പരിഹരിക്കുന്നതിനുള്ള പ്രാരംഭ ചടങ്ങുകളുടെ ഭാഗമായി, ആവശ്യമായ മണ്ണും മറ്റ് പദാർത്ഥങ്ങളും വെള്ളിയാഴ്ച (19.06.2026) വൈകുന്നേരം 4.30-ഓടെ ക്ഷേത്രത്തിന്റെ കിഴക്കേനടയിൽ എത്തിച്ചു.

തുടർന്ന് ശിൽപ്പികളായ എ.ആർ. ദുരൈ കൃഷ്ണ സ്വാമി, തിരുകോഷ്ടിയൂർ മാധവൻ സ്വാമി, പടിഞ്ഞാറെ മഠം സ്വാമിയാർ, കൊട്ടാരം പ്രതിനിധികൾ, എട്ടരയോഗക്കാർ, ക്ഷേത്ര ഭരണസമിതി ചെയർമാൻ, ഉപദേശകസമിതി ചെയർമാൻ, മൂലബിംബ പുനരുദ്ധാരണ വിദഗ്ദ്ധ സമിതി അംഗങ്ങൾ, ഭരണ-ഉപദേശക സമിതി അംഗങ്ങൾ, എക്സിക്യൂട്ടീവ് ഓഫീസർ എന്നിവരടങ്ങുന്ന പ്രമുഖരുടെ സാന്നിധ്യത്തിൽ ഇവ ക്ഷേത്രത്തിനുള്ളിലേക്ക് ആനയിക്കുകയും പ്രദക്ഷിണം പൂർത്തിയാക്കുകയും ചെയ്തു.

കരാർ ഒപ്പിട്ടത് ഫെബ്രുവരിയിൽ

ഏകദേശം 275 വർഷങ്ങൾക്ക് മുൻപ് നിർമ്മിതമായതെന്ന് കരുതപ്പെടുന്ന മൂലബിംബത്തിന്റെ പുനരുദ്ധാരണ പ്രവർത്തനങ്ങൾ ബഹു. ബ്രഹ്മശ്രീ സതീശൻ നമ്പൂതിരിപ്പാടിന്റെ നിർദ്ദേശ പ്രകാരമാണ് നടക്കുന്നത്.

• കരാർ: ഇതിനായി കഴിഞ്ഞ ഫെബ്രുവരി 20-നാണ് ശിൽപ്പികളുമായി ഔദ്യോഗികമായി കരാർ ഒപ്പിട്ടത്.
• പ്രാരംഭ പ്രവൃത്തികൾ: തുടർന്ന്, പ്രസ്തുത പ്രവർത്തികളുമായി ബന്ധപ്പെട്ട ‘മൃത്ത്’ തയ്യാറാക്കുന്നതിന് ആവശ്യമായ കഷായം വെയ്ക്കുന്ന പ്രാരംഭ പ്രവൃത്തികൾ ഇന്നലെ വൈകുന്നേരം 4.45 മുതൽ 5.25 വരെയുള്ള ശുഭമുഹൂർത്തത്തിൽ ആരംഭിച്ചു.

ഭക്തർക്ക് സമർപ്പണം നടത്താം

പുനരുദ്ധാരണ പണികൾ നടക്കുന്ന കാലയളവിൽ ക്ഷേത്രത്തിലെത്തുന്ന എല്ലാ ഭക്തജനങ്ങൾക്കും ഈ പണികളുമായി ബന്ധപ്പെട്ട് തങ്ങളുടെ സമർപ്പണങ്ങൾ നടത്താവുന്നതാണെന്ന് ക്ഷേത്ര എക്സിക്യൂട്ടീവ് ഓഫീസർ അറിയിച്ചു.