സമൂഹം എന്നും പണ്ഡിറ്റ് കറുപ്പനെ ഓർത്തിരിക്കണം: മന്ത്രി കെ. മുരളീധരൻ
തിരുവനന്തപുരം:
ശ്രീനാരായണ ഗുരു, അയ്യങ്കാളി, ഡോ. പൽപ്പു തുടങ്ങിയ മഹദ്വ്യക്തികൾക്കൊപ്പം തോളോട് തോൾ ചേർന്ന് പ്രവർത്തിച്ച നവോത്ഥാന നായകനായിരുന്നു പണ്ഡിറ്റ് കറുപ്പനെന്നും, സമൂഹം എന്നും അദ്ദേഹത്തിന്റെ സംഭാവനകളെ ഓർത്തിരിക്കണമെന്നും ആരോഗ്യ-ദേവസ്വം വകുപ്പ് മന്ത്രി കെ. മുരളീധരൻ പ്രസ്താവിച്ചു. ‘ജാതിക്കുമ്മി’ എന്ന വിപ്ലവകരമായ കവിതയിലൂടെ സാമൂഹിക തിന്മകൾക്കെതിരെ തന്റെ തൂലിക പടവാളാക്കിയ വ്യക്തിത്വമാണ് അദ്ദേഹമെന്നും പുതിയ തലമുറ പണ്ഡിറ്റ് കറുപ്പനെക്കുറിച്ച് കൂടുതൽ പഠിക്കാൻ തയ്യാറാകണമെന്നും മന്ത്രി കൂട്ടിച്ചേർത്തു.
പണ്ഡിറ്റ് കറുപ്പൻ സാംസ്കാരിക സമിതി തിരുവനന്തപുരം ജില്ലാ കമ്മിറ്റിയുടെ നേതൃത്വത്തിൽ സംഘടിപ്പിച്ച വിദ്യാഭ്യാസ അവാർഡ് ദാനവും അനുമോദന സമ്മേളനവും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ചടങ്ങിൽ ആഭ്യന്തര വകുപ്പ് മന്ത്രിയുടെ നിയമ ഉപദേഷ്ടാവ് എ. ഹേമചന്ദ്രൻ ഐ.പി.എസ് മിടുക്കരായ വിദ്യാർത്ഥികൾക്കുള്ള അവാർഡ് വിതരണം നിർവഹിച്ചു. പണ്ഡിറ്റ് കറുപ്പൻ സാംസ്കാരിക സമിതി ജില്ലാ പ്രസിഡന്റ് എസ്. പ്രശാന്തൻ ചടങ്ങിൽ അധ്യക്ഷത വഹിച്ചു.
ധീവരസഭ സീനിയർ വൈസ് പ്രസിഡന്റ് പൂന്തുറ ശ്രീകുമാർ, സി.പി.എം ചാല ഏരിയാ കമ്മിറ്റി സെക്രട്ടറി ജയിൽകുമാർ, സി.പി.ഐ നേമം മണ്ഡലം സെക്രട്ടറി പാപ്പനംകോട് അജയൻ, നഗരസഭ കൗൺസിലർമാരായ എസ്.എസ്. ശ്രുതി, നീറമൺകര ഹരി എന്നിവർ ചടങ്ങിൽ ആശംസകൾ അർപ്പിച്ചു സംസാരിച്ചു.
കൂടാതെ ധീവരസഭ ജില്ലാ പ്രസിഡന്റ് പനത്തുറ പി. ബൈജു, ജില്ലാ സെക്രട്ടറി കാലടി സുഗതൻ, സാംസ്കാരിക സമിതി സംസ്ഥാന ജോയിന്റ് സെക്രട്ടറി ആർ. സുരേഷ് കുമാർ, ധീവര മഹിളാ സഭ ജില്ലാ പ്രസിഡന്റ് ശാന്തി ശിശുപാലൻ എന്നിവരും ചടങ്ങിന് അഭിമുഖ്യമേകി. സാംസ്കാരിക സമിതി ജില്ലാ സെക്രട്ടറി എം.ആർ. മോഹനൻ സ്വാഗതവും, ധീവരസഭ കല്ലടിമുഖം കരയോഗം സെക്രട്ടറി ആർ. സുഗതൻ നന്ദിയും രേഖപ്പെടുത്തി.
