അപ്രഖ്യാപിത ലോഡ് ഷെഡ്ഡിങ്: സർക്കാരിനെതിരെ രൂക്ഷവിമർശനവുമായി വി.ഡി. സതീശൻ
തിരുവനന്തപുരം:
സംസ്ഥാനത്ത് തുടരുന്ന അപ്രഖ്യാപിത വൈദ്യുതി നിയന്ത്രണത്തിനെതിരെ കടുത്ത പ്രതിഷേധവുമായി പ്രതിപക്ഷ നേതാവ് വി.ഡി. സതീശൻ. കൊടുംചൂടിൽ ജനങ്ങൾ വലയുന്നതിനിടെ രാത്രികാലങ്ങളിൽ ഉൾപ്പെടെ വൈദ്യുതി തടയുന്നത് സർക്കാരിന്റെ വെല്ലുവിളിയാണെന്ന് അദ്ദേഹം കുറ്റപ്പെടുത്തി. പവർകട്ട് ഇല്ലാത്ത പത്തു വർഷം എന്ന വാഗ്ദാനം വെറും പാഴ്വാക്കായെന്ന് അദ്ദേഹം പരിഹസിച്ചു.
തിരഞ്ഞെടുപ്പ് മുന്നിൽക്കണ്ട് പിണറായി സർക്കാർ ജനങ്ങളോട് വലിയ നുണകളാണ് പറഞ്ഞുകൊണ്ടിരിക്കുന്നതെന്ന് സതീശൻ ആരോപിച്ചു. ജനജീവിതം ദുസ്സഹമാക്കുന്ന ഈ അപ്രഖ്യാപിത ലോഡ് ഷെഡ്ഡിങ് ഉടനടി പിൻവലിക്കണമെന്നും, അല്ലാത്തപക്ഷം യു.ഡി.എഫ് ശക്തമായ പ്രക്ഷോഭവുമായി തെരുവിലിറങ്ങുമെന്നും പ്രതിപക്ഷ നേതാവ് മുന്നറിയിപ്പ് നൽകി. നിലവിലെ വൈദ്യുതി പ്രതിസന്ധി പരിഹരിക്കുന്നതിൽ സർക്കാർ പരാജയപ്പെട്ടതായും അദ്ദേഹം കൂട്ടിച്ചേർത്തു.
