മണ്ഡല-മകരവിളക്ക് തീർഥാടനത്തിന് തുടക്കം; ശബരിമല ക്ഷേത്രനട ഇന്ന് വൈകിട്ട് തുറക്കും, പുതിയ മേൽശാന്തിമാർ ചുമതലയേൽക്കും

 മണ്ഡല-മകരവിളക്ക് തീർഥാടനത്തിന് തുടക്കം; ശബരിമല ക്ഷേത്രനട ഇന്ന് വൈകിട്ട് തുറക്കും, പുതിയ മേൽശാന്തിമാർ ചുമതലയേൽക്കും

പത്തനംതിട്ട: മണ്ഡല-മകരവിളക്ക് തീർഥാടനത്തിനായി ശബരിമല ക്ഷേത്രനട ഇന്ന് വൈകിട്ട് അഞ്ചിന് തുറക്കും. ഉച്ചയ്ക്ക് 12 മണി മുതൽ നിലയ്ക്കലിൽനിന്ന് പമ്പയിലേക്ക് ഭക്തരെ കടത്തിവിട്ട് തുടങ്ങും. നട തുറന്ന ശേഷം വൈകിട്ട് ആറോടെ സന്നിധാനത്ത് പുതിയ മേൽശാന്തിമാരുടെ സ്ഥാനാരോഹണ ചടങ്ങുകൾ നടക്കും.

പുതിയ മേൽശാന്തിമാരുടെ സ്ഥാനാരോഹണം

തന്ത്രി കണ്ഠര് ബ്രഹ്മദത്തന്റെ സാന്നിധ്യത്തിൽ നിലവിലെ മേൽശാന്തി ഇ.ഡി. പ്രസാദ് നമ്പൂതിരിയാണ് ശ്രീകോവിൽ നട തുറന്ന് ദീപം തെളിക്കുക. തുടർന്ന് പതിനെട്ടാം പടിക്ക് താഴെ ആഴിയിൽ മേൽശാന്തി അഗ്നി പകരും. ഇതിനുശേഷം ഇരുമുടിക്കെട്ടുമായി കാത്തുനിൽക്കുന്ന നിയുക്ത ശബരിമല മേൽശാന്തി സുബ്രഹ്മണ്യൻ ശങ്കരൻ നമ്പൂതിരിപ്പാടിനെയും മാളികപ്പുറം മേൽശാന്തി എ. ദാമോദരൻ നമ്പൂതിരിയെയും അദ്ദേഹം സോപാനത്തേക്ക് ആനയിക്കും.

തുടർന്ന് പുതിയ മേൽശാന്തിമാർ ചുമതലയേൽക്കുന്ന ചടങ്ങുകൾ നടക്കും. ഇന്ന് സന്നിധാനത്ത് സ്ഥാനാരോഹണ ചടങ്ങുകൾ മാത്രമാണുള്ളത്. വൃശ്ചികം ഒന്നായ നാളെ പുലർച്ചെ പുതിയ മേൽശാന്തിമാരാണ് നട തുറക്കുക. മണ്ഡലകാലത്തിന്റെ ആദ്യ ദിനമായ നാളെ ദർശനത്തിനായി ഏകദേശം 70,000 ഭക്തർ എത്തുമെന്നാണ് വിലയിരുത്തൽ. ഇതിനായി സന്നിധാനത്ത് പ്രത്യേക സജ്ജീകരണങ്ങൾ ഒരുക്കിയിട്ടുണ്ട്.

ക്രമീകരണങ്ങൾ വിലയിരുത്താൻ മന്ത്രിയും ബോർഡ് പ്രസിഡന്റും

തീർഥാടനത്തിന്റെ അവസാനവട്ട ഒരുക്കങ്ങൾ വിലയിരുത്താനായി തിരുവിതാംകൂർ ദേവസ്വം ബോർഡ് പ്രസിഡന്റ് ഇന്നലെ രാത്രി സന്നിധാനത്ത് എത്തിയിരുന്നു. നിലയ്ക്കലിലെയും പമ്പയിലെയും സൗകര്യങ്ങൾ നേരിട്ട് പരിശോധിച്ച ശേഷമാണ് അദ്ദേഹം മലകയറിയത്. ദേവസ്വം വകുപ്പ് മന്ത്രി കെ. മുരളീധരനും ഇന്ന് ശബരിമലയിലെത്തും. ആദ്യം പമ്പയിൽ ക്യാമ്പ് ചെയ്ത് ക്രമീകരണങ്ങൾ വിലയിരുത്തുന്ന മന്ത്രി രാത്രിയോടെ സന്നിധാനത്ത് എത്തും. നാളെ വൃശ്ചികം ഒന്നിന് നടക്കുന്ന ചടങ്ങുകളിലും അദ്ദേഹം പങ്കെടുക്കും. ദേവസ്വം ബോർഡിന്റെ ഒരുക്കങ്ങളിൽ നേരത്തെ മന്ത്രി അതൃപ്തി രേഖപ്പെടുത്തിയിരുന്നെങ്കിലും അവസാന ഘട്ടത്തിൽ പ്രവർത്തനങ്ങൾ ഫലപ്രാപ്തിയിൽ എത്തിയെന്നാണ് വകുപ്പിന്റെ വിലയിരുത്തൽ.

തീർഥാടനത്തിൽ ഇത്തവണ വലിയ മാറ്റങ്ങൾ

ടെൻഡർ നടപടികളിലുൾപ്പെടെ വലിയ മാറ്റങ്ങൾ വരുത്തിയാണ് ഇത്തവണത്തെ തീർഥാടനം ആരംഭിക്കുന്നത്. തീർഥാടകർക്ക് ഇൻഷുറൻസ് പരിരക്ഷ ഉറപ്പാക്കിയതിന് പുറമെ ഡോളി സർവീസ് പ്രീപെയ്ഡ് സംവിധാനത്തിലേക്ക് മാറ്റി. പൊലീസ് എ.ഐ (AI) അധിഷ്ഠിത പാർക്കിങ് സൗകര്യമാണ് ഒരുക്കിയിരിക്കുന്നത്. അരവണ വിതരണത്തിനായി 22 കൗണ്ടറുകളും സൗത്ത് ഇന്ത്യൻ ബാങ്കിന്റെ അഞ്ച് വെൻഡിങ് മെഷീനുകളും സ്ഥാപിച്ചിട്ടുണ്ട്. വൃശ്ചികം ഒന്നോടെ 50 ലക്ഷം ടിൻ അരവണ കരുതൽ ശേഖരമായി ഉണ്ടാകുമെന്നാണ് ബോർഡിന്റെ കണക്കുകൂട്ടൽ.

തീർഥാടനത്തോടനുബന്ധിച്ച് അടിസ്ഥാന സൗകര്യങ്ങൾക്കും ശുചീകരണത്തിനുമായി തദ്ദേശ സ്വയംഭരണ വകുപ്പ് പ്രത്യേക ഗ്രാന്റും അനുവദിച്ചിട്ടുണ്ട്. പത്തനംതിട്ട, ആലപ്പുഴ, കോട്ടയം, ഇടുക്കി, കൊല്ലം, തൃശൂർ എന്നീ ആറ് ജില്ലകളിലെ 38 ഗ്രാമപഞ്ചായത്തുകൾക്കും ഒൻപത് മുനിസിപ്പാലിറ്റികൾക്കുമാണ് ഈ തുക ലഭിക്കുക.

Related post

Leave a Reply

Your email address will not be published. Required fields are marked *

Travancore Noble News